အခွင့်အရေးလိုချင်ရင် တာဝန်ယူပါ

မနေ့ က လှည်းတန်းမှာ Client တစ်ယောက်နဲ့သွားတွေ့ပါတယ်။
အလုပ်ကိစ္စပြီးလို့ပြန်တော့ အချိန်လေးပိုနေတာနဲ့ (ချွေတာရေးလည်းပါတာပေါ့ 😛 )
ဘစ်ကားစီးပြီးပြန်ဖြစ်တယ်။

ကားပေါ်ရောက်တော့ လူကြပ်ရတဲ့ထဲ ကံဆိုးစွာနဲ့ပဲ ထိုင်စရာ နေရာမရပါဘူး။
လက်ထဲမှာလည်း Laptop အိတ်တစ်လုံး ၊ ပိုက်ဆံအိတ်ကလည်းလွယ်ထားရတော့ မနိုင်မနင်းနဲ့ပေါ့။
မျှော်လင့်ခြင်းများစွာနဲ့ပဲ အသက် ၁၅/၁၆/၁၇ လောက် ရှိမယ့် ကောင်လေးငယ်ငယ်ချောချောလေးတစ်ယောက်နားမှာ ခပ်တည်တည်နဲ့သွားရပ်လိုက်တယ်။
အိတ်လေးတွေများကိုင်ပေးလေမလား။
စေတနာတွေပိုရင် ထိုင်ရာကများထပေးမလားပေါ့။

တစ်မှတ်တိုင်ကျော်သွားတယ် ကောင်လေးကမသိဘူး။
နှစ်မှတ်တိုင် ထိုင်နေတုန်းပဲ။
သုံးမှတ်တိုင် ၊ သတိထားမိအောင် Laptop အိတ်လေးကိုလက်ပြောင်းကိုင်လိုက်တယ် ၊ မောင်မင်းကြီးသားကဖုန်းတောင်ထုတ်ပြီး Game ဆော့နေလိိုက်သေးတယ်။
လေးမှတ်တိုင် ကာလနာ မြွေပွေးကိုက်ကစလို့ စိတ်ထဲမှာ တတ်သမျှမှတ်သမျှ နည်းပေါင်းစုံနဲ့ကို မေတ္တာပို့မိသွားတယ်။
မေတ္တာပို့မိပြီးတာနဲ့ ချက်ချင်းဆိုသလိုကို ကိုယ့်စိတ်ကိုယ်ကို ပြန်ဆန်းစစ်မိသွားတယ်။
“အော် ငါ မတော်လောဘတွေတက်နေမိပါလား ။ အတ္တတွေကြီးနေမိပါလား”ပေါ့။
တစ်လက်စထဲမှာ ဘာကိုသွားသတိရလဲဆိုတော့
“အမျိုးသမီး အခွင့်အရေး”
“အမျိုးသားများနဲ့တန်းတူရပ်တည်နိုူင်ရေ။”စတဲ့ စကားလုံးတွေတစ်လုံးချင်းတစ်လုံးချင်းက ခေါင်းထဲမှာတွေးစရာတွေတစ်ခုပြီးတစ်ခုကိုဖန်တီးလိုက်တော့တာ။
ပွဲတွေမှာပြောစရာကြုံရင် ကိုယ်တိုင်ဆရာမကြီးစတိုင်နဲ့လူရှေ့ထွက်ပြီး (တစ်ခါတစ်လေစင်ပေါ်မှာ) အကြီးအကျယ် ဆွေးနွေးပေးခဲ့ရတဲ့ စကားလုံးတွေလေ။

ဟုတ်ပါတယ်။
အမျိုးသမီးများအနေနဲ့

လုပ်ငန်းခွင်နဲ့ နေ့စဉ်လူနေမှုူဘဝမှာ အမျိုးသားများနဲ့ တန်းတူ အခွင့်အရေးတွေတောင်းဆိုမယ်ဆိုရင်
ဘစ်ကားပေါ်မှာ ကိုယ့် အထုတ်ကိုယ်နိုင်အောင်သယ်ရမယ်ဆိုတဲ့ တာဝန်ကိုလည်းယောက်ကျားများနဲ့တန်းတူထမ်းဆောင်ရမှာပါ။
နေရာလေးများထပေးလေးမလားဆိုတဲ့ မျှော်လင့်ချက်တွေကို ဘေးဖယ်ထားပြီး ယောကျားများနဲ့တန်းတူ မတ်တပ်
ရပ်ပြီး ဘစ်ကားစီးနိုင်ရမှာပါ။

နေရာတကာမှာ သူကတော့ ယောက်ကျားဖြစ်လို့တာဝန်ယူရမှာပေါ့ဆိုရင် အခွင့်အရေးတွေလည်းသူတို့ပဲရသွားပါလိမ့်မယ်။

ဘစ်ကားပေါ်ကဆင်းတော့ စာကြောင်းလေးတစ်ကြောင်းတွေးမိပြီးပြံုးမိသေးတယ်။

“အခွင့်အရေးလိုချင်ရင် တာဝန်ယူပါ”

ဒါနဲ့စကားမစပ် အခုခေတ်မှာမိန်းမတွေက အိမ်ထောင့်စီင်္းပွားရေးကိုလည်းတစ်ဖက်တစ်လမ်းက တာဝန်ယူနေကြပြီဖြစ်လို့ ယောက်ကျားတွေလည်း အိမ်မှူကိစ္စတွေကိုတော့ဝိုင်းကူစေချင်တယ်ကွယ်လို့ ။
တန်းတူညီတူ။
“မောင်တစ်ထမ်း မယ်တစ်ရွက်” ပေါ့။

Leave a Reply

Your email address will not be published. Required fields are marked *