၁၂-၁၀-၂၀၁၉

မနေ့ညက ၃ နာရီခွဲမှ အိပ်ပျော်သွားလို့ ဒီမနက်အိပ်ရေးဝဝအိပ်မယ်တွေးထားပေမယ့် စောစောထလိုက်ရတယ်။

အိမ်ကလူတွေအလှူရှိတာကို။

အိမ်ကလုပ်တဲ့အလှူဆိုပေမယ့် ကိုယ်နဲ့ဘာမှမဆိုင်ဘူးရယ်။

ကိုယ့်တာဝန်က အလှူငွေလာကောက်ရင်ထည့်ဖို့ကလွဲ အခြားမရှိ။

သန်းခေါင်စာရင်းအရသာ မိသားစုစာရင်းဝင်နေပေမယ့် ဘေးထွက်ထိုင်နေခဲ့ရတာကြာပြီကို။😁

ဒါပေမယ့် အဖွားက အလှူလုပ်မယ့် ဘုန်းကြီးကျောင်းပို့ပေးပါဆိုလို့ အိမ်ယာကနေ ကဗျာကယာထပြီး ရေမိုးချိုးသွားပို့ပေးလိုက်တယ်။

တကယ့်တော့ အဲလိုလူများတဲ့ အလှူတွေ သိပ်မသွားချင်လှ။

ဘုရားရိပ်တရားရိပ်မှာ ရွှေတွဲလွဲ ငွေတွဲလွဲ ပြောင်ပြောင်ရောင်ရောင်တွေ မြင်ရင် အူယားလာတတ်တာလည်းပါတယ်။😂

ထားပါတော့ …

အဖွားကိုပို့ပြီးတော့ ကားဝပ်ရှော့သွားသေးတယ်။

ပိတ်ထားတာနဲ့ဘေးနားက ပရိဘောကအလုပ်ရုံမှာ ကျွန်းကုတင်နဲ့ ကျွန်းစားပွဲသွားကြည့်ပြီးပြန်ခဲ့တယ်။

မယဉ်လှကိုသွားခေါ်ပြီး ရုံးခန်းအသစ်နဲ့ မင်္ဂလာဆောင်ပြီးရင်နေမယ့်အခန်းကိုသွားရှင်းတယ်။

တော်တော်ရှင်းယူရတယ်ဟ။

လူကိုညောင်းချိနေအောင်ရှင်းရတယ်။

ဒါပေမယ့် “ဒါ ငါနေရမယ့် ငါ့အပိုင်နေရာလေးပါလား” ဆိုတဲ့အသိလေးကတော်တော် ပီတိဖြစ်ရတယ်။

နေ့လယ်ကျတော့ အဖွားက လာကြိုဖို့လှမ်းခေါ်တာနဲ့ မနက်ကဘုန်းကြီးကျောင်းပြန်သွားရပြန်ရော။

အခန်းရှင်းလက်စနဲ့မို့တော်တော် ပုံစံကစုတ်ပြတ်သတ်နေပေမယ့် အဖွားကိုအကြာကြီးမစောင့်စေချင်လို့ အဝတ်လဲမနေတော့ဘဲထွက်လာခဲ့တယ်။

ဟိုရောက်တော့ လူတွေအများကြီးနဲ့တိုးတယ်။

ဆေးဆိုးပန်းရိုက်လူတွေကြားမှာ ထုံးစံအတိုင်း ကိုယ်တွေဟာ သင်းကွဲ 😂

အမေမဟုတ်တဲ့ အခြားသူတွေက ထမင်းဝင်စားဖို့လှမ်းခေါ်ကြပေမယ့် (ကံကောင်းတယ်ပြောရမယ်) သက်သတ်လွတ်မရှိလို့ဝင်မစားဖြစ်ခဲ့ဘူး။

ကိုယ်နဲ့မဆိုင်တဲ့ နေရာတစ်ခုမှာ ထမင်းစားဖို့မဆိုနဲ့ ။

လေရှူရတာတောင် အဆင်မပြေလှ။

အဖွားကိုခေါ်ပြီးအိမ်ပြန်ပို့တယ်။

ပြီးတော့ အိမ်ဆက်ရှင်းတယ်။

ညနေရောက်တော့ လူကြီးတွေကိုကန်တော့ဖို့ဆိုပြီးလှမ်ရခေါ်လို့ အိမ်ရှင်းလက်စနဲ့ပဲထွက်ခဲ့ရပြန်တယ်။

တကယ်တော့ ကန်တော့တယ်ဆိုတာကို အယုံအကြည်မရှိတာကြာပြီ။

နောက်ပြီးကိုယ်ဘာအမှားမှမလုပ်ထားသည့်တိုင် ကာယကံ ၊ ဝစီကံ ဘာညာသာရကာ ဘလာဘလာနဲ့ ဝန်ချတောင်းပန်ကန်တော့ လည်း ဘယ်တော့မှ ခွင့်လွှတ်ပေးမှာမဟုတ်တဲ့ အမေ့ကို ကန်တော့နေတော့ရော ဘာထူးမှာမို့လဲ?

အမေ မက်လောက်စရာကောင်းလောက်တဲ့ ငွေထုပ်ကြီးနဲ့ကန်တော့တယ်ဆိုရင်တော့လည်းတစ်မျိုးပေါ့။😂

လူတွေကသာ အမျိုးမျိုးထင်ကြေးတွေပေးနေကြတာ။တကယ်တမ်းအမေနဲ့ကိုယ့်ကြား ပြဿနာကိုဖြေရှင်းနိုင်မှာက ပိုက်ဆံပဲ။

ဘာလို့ဒီလိုပြောရတာလဲဆိုတာ တစ်နေ့တော့ အခြားသူတွေ နားလည်လာပါလိမ့်မယ်။

ဒီတော့

ပိုက်ဆံရှာရမယ်။အများကြီးရှာရမယ်။

အလုပ်တွေလည်း ဒီ့ထက်ပိုကြိုးစားရမယ်။

အိမ်း …

#NOe

Leave a Reply

Your email address will not be published. Required fields are marked *