ဟိုးတုန်းက Super Sunday များ ပြန်လည်တမ်းတမိ

နေ့လည် ၁၁ နာရီလောက် ဦးကျော်ထမင်းပေါင်း ဆိုင်မှာစောင့်ပါချစ်သူ။SUNDay
အခေါက်အသားရော ထမင်းပေါင်း ၂ပွဲခွဲကို နှစ်ယောက်သား ခေါင်းမဖော်တမ်းစားပြီးတဲ့အခါ ပက်စီတစ်လုံးသောက်ချင်တယ်။နောက်ပြီး ကျွဲခေါင်းသီးစားချင်တယ် ချစ်သူ။
မြို့ပတ်ရထားပေါ်ရောက်ရင် ဝယ်ကျွေးပါ။
အင်းစိန်ဘူတာမှာ တက်လေ့ရှိတဲ့
စျေးသည်တွေရဲ့ ပန်းခြင်းတောင်းကြီးတွေက
နှင်းဆီနံ့သင်းသင်းလေးတွေကိို ရှူရှိုက်ရင်း
ကမ္ဘာပေါ်မှာ ဘယ်သူမှမကြားဖူးတဲ့ ပုံပြင်တစ်ပုဒ်ကိုစပြောပါချစ်သူ။
ပုံပြင်အဆုံး မြို့ထဲဘက်ပြန်ရောက်တဲ့အခါ
ဘူတာကြီးမှာဆင်းပြီး နေပြည်တော်မှာ ရုပ်ရှင်ကြည့်ကြမယ်။
လက်မှတ်ကိုကျုပ်ဝယ်မယ်။
မုန့်ကိုရှင်ဝယ်ပါ။
ကျုပ်အတွက်ရေညှိပါပါစေ။
ရှင့်အတွက် ငုံးဥပါပါစေ။
နှစ်ယောက်လုံးအတွက် ရေသန့်ဘူးကြီးလိုအပ်တယ်။နေကြာစေ့က အလုပ်ရှုပ်တယ်။ခွါပြီးသားဖရုံစေ့ ၂ထုပ်ပဲဝယ်ပါ။
ရုပ်ရှင်အချိန်စောနေသေးရင် ရုံရှေ့က ပလပ်ဖောင်းတွေမှာထိုင်စောင့်ရင်း ဖြတ်သွားသမ ျှ ကားနံပါတ်တွေလိုက်ပေါင်းပြပါချစ်သူ။
ရုပ်ရှင်ပြီးရင် ရွှေတောင်တန်းလမ်းက စကားဝါမှာကြေးအိုးသွားစားမယ်။
ထုံးစံအတိုင်း ဝက်ကြေးအိုး ရိုးရိုး အရော ၂ ပွဲ။
အရင်ရောက်တာ ကျုပ်ပန်းကန်။
နောက်မှရောက်မယ့် ရှင့်ပန်းကန်ထဲက အသဲနဲ့ကလီစာတွေကကျုပ်ဝေစု။
ကျုပ်ပန်းကန်ထဲက ငုံးဥ ၂ လုံးနဲ့အသားလုံးက ရှင့်ခွဲတမ်း။
ကြေးအိုးစားပြီး ဖရူတို တစ်လုံးမှာပါ။
ငွေရှင်းပြီးရင် အိမ်ပြန်ချိန်။
အေးအေးဆေးဆေး လမ်းလေ ျှာက်ပြန်ရင်း
စကားလေးဘာလေးပြောကြတာပေါ့။
Steve Job ၊ Dota 2 ၊ စကြာဝဠာ ၊
SUNDEW ၊ နည်းပညာ၊ ဟစ်တလာ ၊
ကလီယိုပတ်ထရာ၊ မာရီလင်မွန်ရိုး၊
ကမ္ဘာစစ်တွေ ၊ မြန်မာခေတ်တွေ
စသဖြင့် စသဖြင့် စသဖြင့်
ရောက်တတ်ရာရာ။
ခြေထောက်တွေညောင်းတဲ့အခါ
သိမ်ဖြူမီးပွိုင့်က ပလပ်ဖောင်းမှာ ခဏထိုင်နားမယ်လေ။
အညောင်းပြေတဲ့အခါ ဆက်လေ ျှာက် ၊
ကျုပ် အိမ်အောက်ရောက်တဲ့အခါ တာ့တာပါ။

ချစ်တယ်(၁)

ကိုယ်စီ လိုအပ်မှုကွက်လပ်တွေကို ဖြည့်ဆည်းနိုင်ဖို့ဆိုတဲ့ အကြောင်းပြချက်နဲ့
တစ်ယောက်ကိုတစ်ယောက် ပိုင်ဆိုင်နိုင်အောင် ကြိုးစားခဲ့ကြတာမဟုတ်ဘူး။

တစ်ယောက်တည်း အဆင်ပြေပြေ ရပ်တည်နိုင်တဲ့ ကိုယ်စီ ဘဝတွေမှာ
တစ်ယောက်ကိုတစ်ယောက် ချစ်ခင်တွယ်တာ ၊ မေတ္တာရှိလွန်းလို့သာ
သံသရာဆုံးတိုင် လက်တွေတွဲဖို့ အားထုတ်ခဲ့ကြခြင်းဖြစ်တယ်။

တစ်ယောက်ကိုတစ်ယောက် မရှိမဖြစ် လိုအပ်နေကြတာမဟုတ်လို့
“တစ်ယောက်မရှိမှာ တစ်ယောက်သေမလောက်အောင်ကြောက်တယ်” ဆိုတဲ့ စိတ်ကူးယဉ်မှုတွေထက်
“အရင်ထွက်သွားမယ့်သူ နောက်ဆံမတင်းရအောင်
ကျန်ခဲ့မယ့်သူက ဘယ်လိုအကောင်းဆုံးရပ်တည်ရမလဲ”
“ကျန်ခဲ့ရမယ့်သူ ဒုက္ခမများရအောင်
အရင်ထွက်သွားမယ့်သူက ဘယ်လိုတွေအကောင်းဆုံး တာဝန်ကျေသွားရမလဲ”ဆိုတာတွေပဲ
ခေါင်းထဲထည့်ထားတယ်။